संपादक --टाइम्स 45 न्यूज मराठी
मो:-- 9730 867 448
तुळजापूर:तुळजापूर नगरपरिषद निवडणुकीच्या प्रचाराचा अंतिम टप्पा सुरू असताना, शिवसेना पक्षाची अधिकृत भूमिका अजूनही स्पष्ट न झाल्याने स्थानिक राजकारणात प्रचंड चर्चांना उधाण आले आहे. प्रचाराचा शेवटचा दिवस असतानाही शिवसेनेने कोणत्याही पक्षाला — भाजप असो वा महाविकास आघाडी — अधिकृत पाठिंबा जाहीर न केल्याने निवडणूक समीकरणे ढवळून निघण्याची मोठी शक्यता राजकीय वर्तुळातून व्यक्त केली जात आहे.
शिवसेनेची ‘वेट अँड वॉच’ भूमिका राजकीयदृष्ट्या महत्त्वाची
तुळजापूरमध्ये शिवसेना हा परंपरेने मजबूत संघटनात्मक पक्ष असून, शहरात त्यांच्या कार्यकर्त्यांची मोठी फौज आहे. या निवडणुकीत शिवसेनेने पाच अधिकृत उमेदवार रिंगणात उतरवले असून त्यामुळे पक्षाचे वातावरण उत्साहवर्धक बनले आहे. कार्यकर्त्यांचा मजबूत आधार, प्रभागनिहाय असलेली पकड आणि शिवसेनेच्या मतांचे संभाव्य ‘ट्रान्स्फर’ कोणत्या गटाला मिळणार यावरच काही प्रभागांचे निकाल अवलंबून असल्याचे राजकीय निरीक्षकांचे मत आहे.
शिवसेनेने पाठिंबा जाहीर करण्यात केलेली ही विलंबित रणनीती ही निवडणुकीतील ‘गेम चेंजर’ ठरू शकते. पक्ष कोणत्या आघाडीला झुकते माप देतो यावरून किमान 3 ते 4 प्रभागांच्या निकालावर थेट परिणाम होण्याची शक्यता आहे
भाजप व महाविकास आघाडी दोन्ही तणावात
शिवसेनेचा पाठिंबा कोणत्या बाजूला जाईल, तसेच त्यांचा मतदारवर्ग कोणाला आपला पर्याय मानणार, याबाबत दोन्ही मोठ्या पॅनेलमध्ये संभ्रमाचे वातावरण आहे.
भाजपला शिवसेनेचे सहकार्य मिळाले तर काही प्रभागांमध्ये त्यांची स्थिती आणखी मजबूत होऊ शकते.
तर महाविकास आघाडीलादेखील शिवसेनेचा अप्रत्यक्ष किंवा प्रत्यक्ष पाठिंबा मिळाल्यास त्यांच्या उमेदवारांना निर्णायक फायदा होऊ शकतो.
दोन्ही बाजूंनी ‘बॅकडोर’ चर्चा सुरू असल्याचे बोलले जात असले तरी शिवसेना मात्र आपली पत्ते अजूनही गुप्तच ठेवताना दिसत आहे.
शेवटच्या क्षणी निर्णय?
शहरात चर्चांना पूर आला आहे की शिवसेना आपली भूमिका मतदानाच्या पूर्वीच्या अंतिम क्षणी जाहीर करू शकते. त्यामुळे दोन्ही प्रमुख पॅनल्समध्ये उत्सुकता आणि प्रतीक्षेचे वातावरण आहे. शिवसेनेचे स्थानिक नेतृत्वही “योग्य वेळी निर्णय जाहीर केला जाईल” एवढेच संकेत देत असून त्यापलीकडे कोणतीही माहिती समोर येत नाही.l
तुळजापूरकरांचे लक्ष शिवसेनेच्या भूमिकेकडे
निवडणूक हा निर्णयाच्या उंबरठ्यावर असताना, तुळजापूर शहरातील सर्वसामान्य मतदारांसह सर्व राजकीय पक्षांचे लक्ष आता फक्त एकाच घोषणेकडे लागले आहे —शिवसेना अखेर कोणती भूमिका घेणार? त्यांचा पाठिंबा कोणत्या गटाला मिळतो यावरून या निवडणुकीचे चित्र मोठ्या प्रमाणात बदलण्याची शक्यता आहे.
कोणत्याही टिप्पण्या नाहीत:
टिप्पणी पोस्ट करा