*करमाळा तालुका --प्रतिनिधी*
*टाइम्स 45 न्यूज मराठी*
पर्यावरण संरक्षण ही काळाची गरज असून प्रत्येक नागरिकाने वृक्षलागवड करून त्यांचे संगोपन करण्याची जबाबदारी स्वीकारली पाहिजे, असा संदेश देत करमाळा एसटी आगार परिसरात वृक्षारोपणाचा प्रेरणादायी उपक्रम उत्साहात पार पडला. अर्बन बँकेचे व्हाईस चेअरमन तथा नगरसेवक महादेव (आण्णा) फंड एस टी आगार प्रमुख प्रमोद शिंदे यांच्या हस्ते वृक्षारोपण करण्यात आले. या उपक्रमात एसटी प्रशासनातील अधिकारी, कर्मचारी तसेच सामाजिक क्षेत्रातील मान्यवरांनी उत्स्फूर्त सहभाग नोंदविला.
पर्यावरणाचा समतोल राखण्यासाठी वृक्षलागवड हा सर्वात प्रभावी उपाय असून प्रत्येकाने आपल्या आयुष्यात किमान एक तरी वृक्ष लावून त्याचे संवर्धन करण्याचा संकल्प करावा, असे आवाहन महादेव (आण्णा) फंड यांनी यावेळी केले. वाढते प्रदूषण, हवामानातील बदल आणि जागतिक तापमानवाढ या गंभीर समस्यांवर मात करण्यासाठी वृक्षसंवर्धनाला पर्याय नसल्याचे त्यांनी स्पष्ट केले.या वृक्षारोपण उपक्रमात संतोष बादाडे, हर्षद वीर, दिलीप चव्हाण, दीपक किरवे, रमेश होनकळसे यांनी सक्रिय सहभाग घेतला. तसेच एसटी आगारातील अधिकारी व कर्मचाऱ्यांनीही मोठ्या उत्साहाने वृक्षारोपण करून पर्यावरण संवर्धनाची जबाबदारी स्वीकारण्याचा निर्धार व्यक्त केला आहे.
यावेळी आगार प्रमुख प्रमोद शिंदे, सहाय्यक वाहतूक अधीक्षक शिवाजी कानडे, वाहतूक निरीक्षक पंकज जाधव, प्रभारक सज्जनकुमार चव्हाण, वाहतूक नियंत्रक हनुमंत बिनवडे तसेच बलभीम दैन यांच्यासह एसटी आगारातील अधिकारी व कर्मचारी उपस्थित होते.
करमाळा आगार परिसर स्वच्छ, हिरवागार आणि पर्यावरणपूरक करण्याच्या उद्देशाने भविष्यातही अशा वृक्षारोपण व वृक्षसंवर्धन उपक्रमांचे सातत्याने आयोजन करण्यात येणार असल्याची माहिती आगार प्रशासनाने दिली. लावलेल्या प्रत्येक वृक्षाचे नियमित संगोपन करण्याची जबाबदारीही संबंधितांकडून स्वीकारण्यात आली.
पर्यावरण संरक्षणाचा प्रभावी संदेश देणाऱ्या या उपक्रमाचे उपस्थित नागरिकांनी स्वागत केले. समाजातील विविध संस्था, संघटना, शैक्षणिक संस्था आणि नागरिकांनी अशाच प्रकारचे वृक्षारोपण व संवर्धनाचे उपक्रम हाती घेऊन हरित महाराष्ट्राच्या उभारणीत सक्रिय योगदान द्यावे, असे आवाहनही यावेळी करण्यात आले आहे
कोणत्याही टिप्पण्या नाहीत:
टिप्पणी पोस्ट करा