*कसगी (ता. उमरगा) - प्रतिनिधी |*
*टाइम्स 45 न्यूज मराठी*
कधी काळी एकमेकांच्या बांधावरून भांडणारे शेतकरी आज एका गटात येऊन लाखो रुपयांची बचत करत असतील, तर ही किमया आहे *सत्यमेव जयते फार्मर कप 2026* ची. याच स्पर्धेत सहभागी झालेल्या *श्री रेवणसिद्धेश्वर शेतकरी गट FC 2026, कसगी* ने शेतीत झालेला आमूलाग्र बदल आणि एकीचे बळ संपूर्ण महाराष्ट्राला दाखवून दिले आहे.
*बदलाची पाच सूत्रे - कसगी पॅटर्न चर्चेत*
गेल्या दोन वर्षांपासून या गटाने शेतीकडे व्यवसाय म्हणून पाहण्यास सुरुवात केली आहे.
1. *एकजूट आणि एकात्मता:* गटातील 20 कुटुंबे एकत्र आल्याने शेतीविषयक निर्णय एकत्र घेतले जात आहेत.
2. *एकत्रित खरेदी - खर्चात बचत:* बियाणे, सेंद्रिय खते, औषधे यांची एकत्रित खरेदी केल्याने निविष्ठा खर्चात 30 ते 40 टक्के बचत झाली आहे.
3. *नैसर्गिक शेतीकडे कल:* रासायनिक शेतीला फाटा देत दशपर्णी अर्क, निंबोळी अर्क, जिवामृत यांचा वापर वाढला आहे.
4. *मजूर बचत आणि तंत्रशुद्ध शेती:* BBF पद्धत, रुंद वरंबा सरी, ठिबक आणि यांत्रिकीकरणामुळे मजुरी खर्चात मोठी बचत.
5. *एकात्मिक कीड नियंत्रण (IPM):* कीड लागल्यावर औषध फवारण्याऐवजी पीक येण्यापूर्वीच प्रतिबंधात्मक उपाययोजना.
या सर्व बदलांमुळे कसगीचा हा गट आज दुष्काळातही हिरवागार उभा आहे.
*कर्नाटकातील दिग्गज NGO ची कसगीला भेट*
या गटाच्या कार्याची कीर्ती आता आंतरराज्य पातळीवर पोहोचली आहे. कर्नाटकातील प्रमुख NGO असलेल्या 'माय-रेडा' - या संस्थेने कसगीला अभ्यास दौऱ्यासाठी भेट दिली.
मॅरेडा ही संस्था संपूर्ण कर्नाटकात पाणलोट क्षेत्रात उल्लेखनीय कार्य करणारी संस्था असून या संस्थेच्या माध्यमातून हजारो शेतकरी उत्पादक कंपन्या (FPO) ची स्थापना झाली आहे.
या अभ्यास दौऱ्यात *गुलबर्गा (कलबुर्गी) जिल्ह्यातील 6 ते 8 FPO चे प्रमुख आणि आंध्र सीमेलगत तसेच धाराशिव जिल्ह्याला लागून असलेल्या भागातील शेतकरी प्रतिनिधी* सहभागी झाले होते. त्यांनी कसगीच्या शेतकऱ्यांसोबत थेट शेतात जाऊन चर्चा केली, त्यांच्या जैविक निविष्ठा निर्मिती युनिट, जलतारे आणि गटशेतीच्या हिशोबाची माहिती घेतली.
"कसगी पॅटर्न आम्ही कर्नाटकात राबवू," असे प्रोत्साहित मत यावेळी MYRADA च्या प्रतिनिधींनी व्यक्त केले.
या दौऱ्यामुळे *पाणी फाऊंडेशन आणि सत्यमेव जयते फार्मर कपच्या कार्याचा प्रचार आणि प्रसिद्धी आता महाराष्ट्राच्या सीमा ओलांडून कर्नाटक आणि आंध्र प्रदेशापर्यंत* पोहोचली असून श्री रेवणसिद्धेश्वर शेतकरी गट हा राज्यासाठी एक आदर्श मॉडेल म्हणून उदयास येत आहे.
कोणत्याही टिप्पण्‍या नाहीत:
टिप्पणी पोस्ट करा