*कार्यकारी संपादक - एस. बी. तांबोळी -टाइम्स 45 न्यूज मराठी*
*मो:-- 8378081147
-----शहाजीनगर (ता. इंदापूर) येथील निरा-भीमा सहकारी साखर कारखान्याच्या पंचवार्षिक निवडणुकीसाठीची प्रारूप मतदारयादी प्रसिद्ध करण्यात आलेली आहे. तसेच, त्या यादीवर सभासदांना २४ जानेवारीपर्यंत हरकती, आक्षेप दाखल करता येणार आहेत; तशी अधिसूचना जिल्हा सहकारी निवडणूक अधिकारी तथा पुणे प्रादेशिक साखर सहसंचालक नीलिमा गायकवाड यांनी जारी केलेली आहे.
निरा-भीमा सहकारी साखर कारखान्याच्या सन २०२४-२५ मध्ये होणाऱ्या संचालक मंडळ निवडणुकीकरिता कारखान्याची प्राथमिक मतदारयादी अर्हता दिनांक १ जानेवारी २०२५ (कटऑफ डेट) निश्चित करण्यात आली आहे. या अर्हता दिनांकास अनुसरून संस्थेने सादर केलेल्या पात्र सभासद मतदारांची प्रारूप मतदारयादी चार ठिकाणी कार्यालयीन वेळेत पाहण्यासाठी व तपासणीसाठी जाहीर करण्यात आली आहे. त्यामध्ये पुणे प्रादेशिक साखर सहसंचालक कार्यालय (साखर संकुल इमारत पुणे) यांच्यासह निरा-भीमा साखर कारखाना इंदापूर, इंदापूर सहायक निबंधक कार्यालय आणि इंदापूर तहसीलदार कार्यालय येथे ती उपलब्ध आहे.
आक्षेप वा हरकतींवर निर्णय घेऊन मतदार यादी अंतिम करण्यात येईल. दरम्यान, दाखल हरकती व आक्षेप यांच्यावर साखर संकुल येथील प्रादेशिक साखर सहसंचालक कार्यालयात ३१ जानेवारी २०२५ पर्यंत निर्णय घेतला जाणार आहे. तर, कारखान्याची अंतिम मतदारयादी ३ फेब्रुवारी रोजी साखर सहसंचालक कार्यालय व निरा-भीमा कारखाना येथे प्रसिद्ध करण्यात येणार असल्याचेही गायकवाड यांनी अधिसूचनेत नमूद केली आहे.
---------------------------
कोणत्याही टिप्पण्‍या नाहीत:
टिप्पणी पोस्ट करा