इंदापूर तालुका ---प्रतिनिधी
डॉ.संदेश शहा
मो:-9921 419 159
सावित्रीबाई फुले पुणे विद्यापीठ, पुणे आणि विद्यार्थी कल्याण मंडळ यांच्या संयुक्त विद्यमाने दिनांक १७ सप्टेंबर रोजी दादा पाटील महाविद्यालय, कर्जत जि. अहमदनगर या ठिकाणी आंतर महाविद्यालयीन सांस्कृतिक युवक महोत्सवाचे आयोजन करण्यात आले होते. या महोत्सवात इंदापूर तालुका शिक्षण प्रसारक मंडळ संचलित कला, विज्ञान आणि वाणिज्य महाविद्यालयातील विद्यार्थ्यांनी विविध कला प्रकारात सहभाग नोंदविला. यामध्ये प्रामुख्याने वादविवाद स्पर्धेत अक्षय यादव आणि सायली मखरे या विद्यार्थ्यांना प्रथम क्रमांकाचे सुवर्णपदक मिळाले तसेच भारतीय वैयक्तिक गायन स्पर्धेत सरदार मुलाणी या विद्यार्थ्याला तृतीय क्रमांकाचे कांस्यपदक प्राप्त झाले तर ओंकार कदम या विद्यार्थ्याला तालवाद्य या प्रकारात द्वितीय क्रमांकाचे रौप्य पदक मिळाले. या यशाबद्दल राष्ट्रीय सहकारी साखर कारखाना महासंघाचे अध्यक्ष, माजी सहकार मंत्री व संस्थेचे अध्यक्ष हर्षवर्धन पाटील यांनी सर्व विजेत्या व सहभागी विद्यार्थ्यांचा सत्कार केला.
यावेळी माजी मंत्री हर्षवर्धन पाटील म्हणाले, आजचा विद्यार्थी देशाचा उद्याचा जबाबदार नागरिक आहे. आयुष्यात यशस्वी होण्यासाठी विद्यार्थ्यांनी आपल्या अंगातील सुप्त कला गुणांचा सर्वांगीण विकास करणे ही काळाची गरज आहे. त्यांनी सर्व यशस्वी विद्यार्थ्यांचे कौतुक करत महाविद्यालयाचे नाव उज्ज्वल केल्याबद्दल त्यांचे अभिनंदन करून त्यांना शुभेच्छा दिल्या. विद्यार्थ्यांच्या सर्वांगीण विकासासाठी आम्ही कटीबद्ध असल्याचे त्यांनी स्पष्ट केले.
यावेळी राष्ट्रवादी काँग्रेस शरदचंद्र पवार पक्षाचे तालुकाध्यक्ष ॲड. तेजसिंह पाटील, जेष्ठ नेते अशोक घोगरे, संस्थेचे सर्व पदाधिकारी, प्राचार्य डॉ. जीवन सरवदे, कला विभाग प्रमुख डॉ. भरत भुजबळ, विज्ञान विभाग प्रमुख डॉ. शिवाजी वीर, वाणिज्य विभाग प्रमुख डॉ. सदाशिव उंबरदंड यांनी विद्यार्थ्यांचे अभिनंदन करून पुढील विभागीय फेरीसाठी शुभेच्छा दिल्या.
सांस्कृतिक विभाग प्रमुख डॉ. प्रज्ञा लामतुरे, विद्यार्थी विकास अधिकारी डॉ. तानाजी कसबे, प्रा. प्रकाश करे, प्रा. सचिन आरडे यांनी विद्यार्थ्यांना अनमोल मार्गदर्शन केले.
कोणत्याही टिप्पण्‍या नाहीत:
टिप्पणी पोस्ट करा