कृष्णा भीमा आघाडीचे अधिकृत उमेदवार प्रदीप गारटकर यांचा नगराध्यक्ष पदासाठी तसेच पॅनेलचे मोठे शक्ती प्रदर्शन माजी मंत्री हर्षवर्धन पाटील माजी आमदार यशवंत माने व भाजप नेते प्रवीण माने यांच्या सह हजारो समर्थकांच्या उपस्थितीत उमेदवारी अर्ज दाखल

 सहसंपादक- डॉ. संदेश शहा 

टाइम्स 45 न्यूज मराठी 

9922 419 159

इंदापूर नगरपरिषद पंचवार्षिक निवडणुकीत  भाजप, राष्ट्रवादी काँग्रेस शरदचंद्र पवार पक्ष, राष्ट्रीय समाज पक्ष व इतर सहकारी पक्षाच्या वतीने इंदापूर शहराच्या सर्वांगीण विकासासाठी राजकीय जोडे बाजूस ठेवून कृष्णा भीमा आघाडी स्थापन करण्यात आली आहे. या आघाडीचे नगराध्यक्ष पदाचे उमेदवार म्हणून माजी नगराध्यक्ष प्रदीप गारटकर यांनी आपल्या पॅनलसह मोठे शक्ती प्रदर्शन करत माजी मंत्री हर्षवर्धन पाटील, माजी आमदार यशवंत माने, भाजपा नेते प्रवीण माने, राष्ट्रवादी काँग्रेस शरदचंद्र पवार पक्षाचे कार्याध्यक्ष महारुद्र पाटील, सौ. अनुराधा गारटकर, ॲड. गिरीश शहा यांच्या उपस्थितीत आपले उमेदवारी अर्ज निवडणूक निर्णय अधिकारी सुधाकर मागाडे, सहाय्यक अधिकारी रमेश ढगे यांच्याकडे दाखल केले. उमेदवारी अर्ज दाखल करण्याच्या अंतिम दिनी श्री. गारटकर यांनी अर्ज दाखल करताना तयार झालेल्या इंदापूर पॅटर्नने सर्वांचे लक्ष वेधून घेतले आहे.

इंदापूर शहराचे दैवत श्री इंद्रेश्वरांचे दर्शन घेऊन नेहरू चौकातून कृष्णा भीमा आघाडीने मुख्य बाजारपेठेतून शक्ती प्रदर्शनास सुरुवात झाली. सर्वच क्षेत्रातील नागरिक या शक्ती प्रदर्शनाच्या रॅलीत सहभागी झाले होते. जागोजागी फटाक्यांची आतिषबाजी, भले मोठे पुष्पहार गळ्यात घालून नगराध्यक्ष पदाचे उमेदवार प्रदीप गारटकर, माजी मंत्री हर्षवर्धन पाटील, माजी आमदार यशवंत माने, भाजपा नेते प्रवीण माने,  यांचा नागरिक, समर्थक उस्फूर्तपणे सन्मान करत होते. नेहरू चौक, मुख्य बाजार पेठ, छत्रपती शिवाजी चौक, नगरपरिषद रोड मार्गे ही भव्य रॅलीचा नगरपरिषद भवन समोरील मैदानात समारोप करण्यात आला.

कृष्णा भीमा विकास आघाडीचे अधिकृत उमेदवार प्रदीप गारटकर म्हणाले, मी ४५ वर्षा पासून समाजकारणात असून सर्वसामान्यांना न्याय देण्याचा नेहमी प्रयत्न केला आहे. त्यामुळे मला सर्वांनी नगराध्यक्ष पदाचा उमेदवारी अर्ज भरण्यास प्रवृत्त केले. माझी इंदापूर नगरपरिषदेवर दहा वर्ष सत्ता होती. त्यावेळी मी सर्वसामान्य ३७ कार्यकर्त्यांना नगराध्यक्ष तर शेकडो जणांना नगरसेवक बनविले. त्यामुळे मला या पदाची शौक नाही, पण इंदापूरच्या लोकप्रतिनिधीने अनेक कार्यकर्ते संपवण्याचे  कट कारस्थान चालवले आहे. मी जिल्हाध्यक्ष असताना त्यांनी राजकीय, सार्वजनिक बाबीस सतत बगल द्यायचा प्रयत्न करून  चांगल्या कार्यकर्त्यांना  संपवण्याचे काम केले आहे, करत आहेत.

पक्षश्रेष्ठी आणि इंदापुरातल्या नेत्यांनी एकतर्फी हुकूमशाही   चालवली आहे. पक्ष हा कार्यकर्ते व संघटना यामुळे मोठा होता. पक्ष कार्यकर्त्याच्या जीवावर चालतो मात्र येथे प्रामाणिक कार्यकर्ते संपविण्याचा प्रयत्न होत असल्याने कार्यकर्त्यांचा स्वाभिमान जपण्यासाठी मी जिल्हाध्यक्ष पदाचा राजीनामा देऊन कृष्णा भीमा आघाडीतून उमेदवारी अर्ज भरला आहे. मी केलेल्या कामाची पोचपावती म्हणून नागरिक मोठ्या प्रमाणावर उस्फूर्तपणे उपस्थित आहेत. मी उमेदवार नसून इंदापुरातला प्रत्येक रहिवासी हा नगराध्यक्षाचा पदाचा उमेदवार असल्याचे त्यांनी सूतोवाच करताच टाळ्यांचा कडकडाट झाला.

माजी मंत्री हर्षवर्धन पाटील म्हणाले, लोकशाही मध्ये लोकसेवेचे महत्त्वपूर्ण स्थान असून प्रदीप गारटकर हे लोकसेवक आहेत. नगरपरिषदेवर त्यांची दहा तर आमची १५ वर्ष सत्ता होती. आम्ही विरोधक होतो मात्र आता स्थानिक पातळीवर आम्ही एकत्र आलो आहे. श्री. गारटकर हे आपण दुसऱ्या कार्यकर्त्यास तिकीट देऊ म्हणत होते मात्र आम्ही त्यांना नगराध्यक्षपदाचे उमेदवार म्हणून लढण्यासाठी तयार केले. आम्ही सत्तेपेक्षा शब्दांना जास्त किंमत देतो. त्यामुळे आमचा हा निवडणुकीचा इंदापूर पॅटर्न आगामी सर्व निवडणुकीत राहणार असून आमचे यश निश्चित आहे.

मोहोळ चे माजी आमदार यशवंत माने म्हणाले,महाविद्यालयीन शिक्षण घेण्यापासून मी प्रदीप गारटकर यांना ओळखतो. सर्वसामान्य नागरिकांचे प्रश्न सोडविणारे ते अभ्यासू व लढाऊ कार्यकर्ता आहेत. रात्री अपरात्री  धावून येणारे प्रदीप गारटकर आहेत. त्यामुळे त्यांना या निवडणुकीत मोठ्या मताधिक्याने इंदापूरची जनता विजयी करेल हा मला विश्वास आहे.

 यावेळी भाजपा नेते प्रवीण माने म्हणाले, आमच्या आघाडीचे नाव भगवान कृष्ण व भीम यांच्या नावावरून घेतले असून प्रदीप गारटकर हे आमच्या कृष्णा भीमा आघाडीचे नगराध्यक्ष पदाचे उमेदवार आहेत. त्यांच्या नेतृत्वाखालील आमच्या आघाडीचे पॅनल २१ विरुद्ध शून्य मताधिक्याने निश्चित विजयी होईल. 

यावेळी राष्ट्रवादी काँग्रेस शरदचंद्र पवार पक्षाचे तालुकाध्यक्ष ॲड. तेजसिंह पाटील, भाजपा नेते मयुरसिंह पाटील यांचे देखील भाषण झाले.

या पॅनेलचे उमेदवार, आपले मेंबर ग्रुप चे अध्यक्ष अनिल पवार यांनी देखील मोठे शक्ती प्रदर्शन करत आपला उमेदवारी अर्ज दाखल केला.

यावेळी मारुतराव वणवे, विठ्ठलराव ननवरे, ॲड शरद जामदार, राजेश जामदार, अतुल शेटे पाटील, श्रीधर बाब्रस, अनिल राऊत, किरण गानबोटे, ॲड. आशुतोष भोसले, वासिम बागवान आदी मान्यवर उपस्थित होते.