*तुळजापुरात शिवसेना शिंदे गटाला मोठी गळती* *युवांचा सेना तालुकाध्यक्ष गणेश पाटील यांच्यासह अनेकांचा राजीनामा, राजकीय वर्तुळात खळबळ**

 *संपादक -*

*टाइम्स 45 न्यूज मराठी*

*मो:-9730867448*

तुळजापूर तालुक्यात शिवसेना (एकनाथ शिंदे गट) यांना निवडणुकीच्या तोंडावर मोठा धक्का बसल्याचे स्पष्ट चित्र समोर आले आहे. पक्षातील अंतर्गत नाराजी आता उघडपणे बाहेर पडू लागली असून, युवा सेनेचे तालुकाध्यक्ष गणेश पाटील यांच्यासह अनेक पदाधिकारी व कार्यकर्त्यांनी एकत्रितपणे पक्षाचा राजीनामा दिल्याची माहिती समोर आली आहे. या अचानक घडलेल्या घडामोडींमुळे तुळजापूर तालुक्याच्या राजकीय वर्तुळात मोठी खळबळ उडाली आहे.

प्राप्त प्राथमिक माहितीनुसार, युवा सेनेचे तालुकाध्यक्ष गणेश पाटील यांनी आपल्या पदाचा तसेच शिवसेना (शिंदे गट) च्या प्राथमिक सदस्यत्वाचा राजीनामा दिला असून, तो युवा सेनेचे जिल्हाध्यक्ष गणेश जगताप यांच्याकडे पाठवण्यात आला आहे. विशेष म्हणजे हा राजीनामा केवळ एका व्यक्तीपुरता मर्यादित नसून, तालुक्यातील विविध भागांतील अनेक प्रमुख पदाधिकारी व सक्रिय कार्यकर्त्यांनी एकाचवेळी राजीनामे दिल्याची चर्चा राजकीय वर्तुळात सुरू आहे.

राजीनामा देणाऱ्यांमध्ये गणेश पाटील यांच्यासह दत्तात्रय सोनवणे, दत्ता डोके, मुकुंद मर्डे, श्रीलेश मुळे, सैफन शेख, भगवत बरगडे, सारिका चुंगे, विश्वजीत लंगडे, समाधान डोलारे, यश जगताप, शिवम काठेवाड, दुर्गेश दळवी, प्रणव चव्हाण, श्रीकांत सौदागर घाटे, महादेव जानकर, दीपक वीर, अमोल गायकवाड, समाधान गुरव, सुरज धनाजी गायकवाड यांच्यासह अन्य काही पदाधिकारी व कार्यकर्त्यांचा समावेश असल्याची प्राथमिक माहिती मिळत आहे. या सर्वांनी पक्षाच्या कार्यपद्धतीबाबत तीव्र नाराजी व्यक्त केल्याचे बोलले जात आहे.

सूत्रांकडून मिळालेल्या माहितीनुसार, आगामी जिल्हा परिषद व पंचायत समिती निवडणुकांच्या पार्श्वभूमीवर स्थानिक कार्यकर्त्यांना विश्वासात न घेता निर्णय घेतले जात असल्याची भावना पक्षातील अनेकांमध्ये होती. तसेच अनेक निष्ठावंत कार्यकर्त्यांना अपेक्षित सन्मान, जबाबदाऱ्या व संधी न मिळाल्याने नाराजी वाढत गेली. हीच नाराजी आता राजीनाम्याच्या स्वरूपात उघडपणे समोर येत असल्याचे चित्र दिसून येत आहे.

निवडणुकीच्या तोंडावर युवा सेनेचा तालुकाध्यक्ष आणि मोठ्या संख्येने कार्यकर्ते पक्ष सोडत असल्याने शिवसेना शिंदे गटाच्या तालुक्यातील संघटनात्मक ताकदीवर याचा थेट परिणाम होण्याची शक्यता वर्तवली जात आहे. विशेषतः युवा सेनेतील ही गळती पक्षासाठी चिंतेचा विषय मानली जात असून, याचा येणाऱ्या निवडणुकांवर काय परिणाम होणार, याबाबत राजकीय वर्तुळात विविध तर्कवितर्क लावले जात आहेत.

दरम्यान, राजीनाम्यानंतर गणेश पाटील यांची पुढील राजकीय भूमिका काय असणार, ते कोणत्या पक्षात प्रवेश करणार, याबाबतही जोरदार चर्चा सुरू झाली आहे. निवडणुकीच्या पार्श्वभूमीवर काही प्रमुख राजकीय पक्षांकडून गणेश पाटील यांना ऑफर देण्यात आल्याचीही चर्चा असून, मात्र याबाबत अद्याप कोणतीही अधिकृत घोषणा झालेली नाही. यामुळे तुळजापूर तालुक्यातील राजकीय हालचालींना आणखी वेग येण्याची शक्यता व्यक्त केली जात आहे.

या संपूर्ण राजीनामा प्रकरणावर शिवसेना शिंदे गटाचे जिल्हाध्यक्ष व पक्षश्रेष्ठ कोणती भूमिका घेणार, नाराज पदाधिकारी व कार्यकर्त्यांची समजूत काढण्यासाठी प्रयत्न केले जाणार का, याकडे सर्वांचे लक्ष लागून राहिले आहे. एकंदरीतच, गणेश पाटील यांच्या राजीनाम्याने शिवसेना शिंदे गटाला तुळजापुरात मोठा धक्का बसल्याचे बोलले जात असून, आगामी काळात येथील राजकीय समीकरणे बदलण्याची शक्यता नाकारता येत नाही.