*मुख्यसंपादक*
*टाइम्स 45 न्यूज मराठी*
*मो:-9730867448*
विजांच्या कडकडाटासह तुफान येणार; महाराष्ट्रातील 15 जिल्ह्यांना 'यलो अलर्ट' जारी, पाहा यादी!
विशेषतः विदर्भातील काही जिल्ह्यांमध्ये जोरदार पाऊस, मेघगर्जना आणि वादळी वाऱ्यांचा इशारा देण्यात आल्याने नागरिक आणि शेतकऱ्यांना सतर्क राहण्याचे आवाहन करण्यात आले आहे.
उत्तर महाराष्ट्रात यलो अलर्ट
हवामान विभागाच्या अंदाजानुसार उत्तर महाराष्ट्रातील धुळे, नंदुरबार, जळगाव आणि नाशिक या चार जिल्ह्यांमध्ये पावसाचा यलो अलर्ट जारी करण्यात आला आहे. या भागांमध्ये मेघगर्जनेसह हलका ते मध्यम स्वरूपाचा पाऊस पडण्याची शक्यता असून काही ठिकाणी विजांचा कडकडाट आणि ताशी वेगाने वाहणारे वारे अनुभवायला मिळू शकतात. त्यामुळे शेतकऱ्यांनी शेतीची कामे करताना आवश्यक खबरदारी घेण्याचा सल्ला देण्यात आला आहे.
विदर्भातही पावसाचा यलो अलर्ट
दुसरीकडे विदर्भातील अकोला, भंडारा, बुलढाणा, गडचिरोली, गोंदिया आणि नागपूर या सहा जिल्ह्यांमध्येही यलो अलर्ट लागू करण्यात आला आहे. या भागांमध्ये हलका ते मध्यम पाऊस पडण्याचा अंदाज असून वातावरण ढगाळ राहण्याची शक्यता आहे. गेल्या काही दिवसांपासून वाढलेल्या उष्णतेमुळे त्रस्त झालेल्या नागरिकांना या पावसामुळे काहीसा दिलासा मिळू शकतो.
विदर्भातील या जिल्ह्यांना ऑरेंज अलर्ट
दरम्यान, विदर्भातील अमरावती, चंद्रपूर, वर्धा आणि यवतमाळ या चार जिल्ह्यांसाठी हवामान विभागाने ऑरेंज अलर्ट जारी केला आहे. या भागांमध्ये जोरदार पावसासह मेघगर्जना, विजांचा कडकडाट आणि वादळी वाऱ्यांची शक्यता व्यक्त करण्यात आली आहे. संभाव्य हवामान बदल लक्षात घेता नागरिकांनी अनावश्यक प्रवास टाळावा तसेच सुरक्षित ठिकाणी राहण्याचे आवाहन प्रशासनाकडून करण्यात आले आहे.
पश्चिम महाराष्ट्रात हलक्या ते मध्यम स्वरूपाचा पाऊस
पश्चिम महाराष्ट्रातही पावसाची शक्यता वाढली असून पुणे, सातारा, सांगली, कोल्हापूर आणि सोलापूर या जिल्ह्यांमध्ये काही ठिकाणी हलक्या ते मध्यम स्वरूपाच्या पावसाच्या सरी कोसळू शकतात. वातावरणातील आर्द्रतेचे प्रमाण वाढल्यामुळे दुपारनंतर ढगाळ वातावरण तयार होण्याचा अंदाज व्यक्त करण्यात आला आहे. त्यामुळे उष्णतेची तीव्रता काही प्रमाणात कमी होण्याची शक्यता आहे.
कोकणात हलक्या ते मध्यम स्वरूपाचा पाऊस
कोकण विभागातील रत्नागिरी आणि सिंधुदुर्ग जिल्ह्यांसाठी सध्या कोणताही विशेष अलर्ट जारी करण्यात आलेला नसला तरी हलक्या ते मध्यम स्वरूपाच्या पावसाची शक्यता हवामान विभागाने वर्तवली आहे. किनारपट्टी भागात ढगाळ वातावरण राहणार असून मच्छीमार आणि समुद्रकिनारी राहणाऱ्या नागरिकांनी सतर्क राहावे, असे आवाहन करण्यात आले आहे.
मराठवाड्यात मध्यम स्वरूपाचा पाऊस
मराठवाड्यातील छत्रपती संभाजीनगर, जालना, परभणी, बीड, हिंगोली आणि नांदेड या जिल्ह्यांमध्येही हलका ते मध्यम पाऊस पडण्याचा अंदाज आहे. काही भागांमध्ये विजांच्या कडकडाटासह पावसाची शक्यता असल्यामुळे नागरिकांनी तसेच शेतकऱ्यांनी हवामान विभागाच्या सूचनांचे पालन करण्याचे आवाहन करण्यात आले आहे.
पुढील काही दिवस हवामानात मोठे बदल
राज्यात मान्सूनपूर्व पावसाची तीव्रता वाढत असल्याने पुढील काही दिवस हवामानात मोठे बदल दिसून येण्याची शक्यता आहे. त्यामुळे नागरिकांनी सतर्क राहून स्थानिक प्रशासन आणि हवामान विभागाच्या अधिकृत सूचना नियमितपणे तपासाव्यात
कोणत्याही टिप्पण्या नाहीत:
टिप्पणी पोस्ट करा