*अकलूज प्रतिनिधी*
*टाइम्स 45 न्यूज मराठी*
*मो 9730867448*
अकलूज आणि महाळुंग रोड परिसरातील दोन वेगवेगळ्या लॉजिंग व खाजगी इमारतींमध्ये सुरू असलेल्या हायप्रोफाईल वेश्या व्यवसायाचा सोलापूर ग्रामीणच्या अनैतिक मानवी वाहतूक प्रतिबंधक कक्ष (AHTU) आणि अकलूज पोलिसांनी संयुक्त कारवाई करत पर्दाफाश केला आहे. ७ जुलै २०२६ रोजी करण्यात आलेल्या या धडक कारवायांमध्ये एकूण तीन पीडित महिलांची सुटका करण्यात आली असून, दोन लॉज मालक आणि दोन मॅनेजर अशा एकूण चार आरोपींना अटक करण्यात आली आहे. पोलिसांच्या या लागोपाठच्या कारवायांमुळे अकलूज परिसरात एकच खळबळ उडाली आहे.
कारवाई १:
अकलूज ते महाळुंग रोडवर असलेल्या विनायक आडत यांच्या खाजगी इमारतीत महिलांना बोलावून वेश्या व्यवसाय करून घेतला जात असल्याची गोपनीय माहिती सोलापूर ग्रामीणचे पोलीस अधीक्षक यांना मिळाली होती. या माहितीच्या आधारे अनैतिक मानवी वाहतूक प्रतिबंधक कक्षाचे पोलीस अधिकारी आणि अकलूज पोलिसांनी तात्काळ एक पथक तयार केले.
पोलिसांनी या ठिकाणी खात्री करण्यासाठी एक बनावट ग्राहक (डिकॉय कस्टमर) २,००० रुपयांच्या चिन्हांकित नोटा देऊन पाठवला. बनावट ग्राहकाने आत जाऊन सौदा निश्चित केल्यानंतर इशारा करताच, दबा धरून बसलेल्या पोलीस पथकाने ७ जुलै २०२६ रोजी सायंकाळी ५.०५ वाजताच्या सुमारास या दोन मजली इमारतीवर थेट छापा टाकला.
छाप्या दरम्यान इमारतीच्या दर्शनी भागात खुर्चीवर बसलेला लॉज मालक विनायक काशिनाथ आडत (वय ४०, रा. निमगाव रोड, वेळापूर, ता. माळशिरस) आणि स्वतःला मॅनेजर म्हणवून घेणारा महादेव आप्पा चौधरी (वय ३९, रा. आसबेवस्ती, संग्रामनगर, ता. माळशिरस) हे दोघे पोलिसांना मिळून आले. पोलिसांनी तात्काळ या दोघांना ताब्यात घेतले.
यावेळी पोलिसांनी इमारतीमधील खोल्यांची तपासणी केली असता, रूम नंबर १ आणि रूम नंबर २ मध्ये दोन महिला मिळून आल्या. पैशांचे आमिष दाखवून त्यांना वेश्या व्यवसायासाठी येथे आणले गेल्याचे चौकशीत उघड झाले. यातील एक महिला नवी मुंबई तर दुसरी महिला पुणे येथील रहिवासी आहे.
जप्त मुद्देमाल: बनावट ग्राहकाकडून घेतलेले रोख २,००० रुपये (५०० च्या ४ नोटा), विवो कंपनीचे २ मोबाईल हँडसेट (किंमत अंदाजे २०,००० रुपये) आणि १४ सिलबंद निरोध पाकीट असा एकूण २२,००० रुपयांचा मुद्देमाल जप्त केला.
सदर गुन्हा सहाय्यक पोलीस फौजदार विश्वजीत भाऊसाहेब यांच्या फिर्यादीवरून आरोपी विनायक आडत आणि महादेव चौधरी यांच्याविरुद्ध भारतीय न्याय संहिता (BNS) कलम १४३(२), १४४, ३(५) आणि 'पिटा' कायदा (PITA) अन्वये गुन्हा दाखल केला आहे
कारवाई २:
दुसऱ्या एका कारवाईत, अकलूज ते म्हाळुंग रोडवरील बडे नगर भागात असलेल्या **'लयभारी लॉजिंग'**मध्ये महिलांना डांबून ठेवून वेश्याव्यवसाय करून घेतला जात असल्याची माहिती पोलिसांना मिळाली होती. महिला सहाय्यक पोलीस फौजदार सविता कोकणे आणि पो.नि. दीपक भिताडे यांच्या मार्गदर्शनाखाली पोलिसांनी दोन पंचांना सोबत घेऊन येथे सापळा रचला.
पोलिसांनी एका बनावट ग्राहकाला ५०० रुपयांच्या तीन चिन्हांकित नोटा (एकूण १५०० रुपये) देऊन लॉजवर पाठवले. व्यवहार निश्चित होताच पोलिसांना इशारा मिळाला आणि पथकाने मंगळवारी (७ जुलै) रात्री ११ वाजण्याच्या सुमारास लॉजवर धाड टाकली.
या छाप्यात पोलिसांनी लॉज मालक हेमंत नामदेव बडे (वय ५६, रा. बडेनगर, अकलूज) आणि लॉज मॅनेजर सचिन राजाराम बनसोडे (वय ३५, रा. यशवंत नगर, अकलूज) या दोघांना अटक केली.
लॉजमधील एका खोलीची झडती घेतली असता, तिथे हडपसर (पुणे) येथील रहिवासी असलेली ३५ वर्षीय महिला आढळून आली. आरोपी हेमंत बडे याने तिला लॉजवर स्वयंपाकाचे काम देण्याच्या बहाण्याने बोलावून घेतले होते, मात्र तिथे आल्यानंतर तिला पैशांचे आमिष दाखवून जबरदस्तीने वेश्याव्यवसाय करण्यास भाग पाडले जात असल्याचे समोर आले. पोलिसांनी तिची सुटका केली.
जप्त मुद्देमाल: मॅनेजर सचिन बनसोडे याच्याकडून चिन्हांकित १५०० रुपये, दोन महागडे मोबाईल फोन आणि इतर आक्षेपार्ह साहित्य असा एकूण २१,५०० रुपयांचा मुद्देमाल जप्त करण्यात आला.
दाखल गुन्हा: याप्रकरणी अकलूज पोलीस ठाण्यात आरोपी हेमंत बडे आणि सचिन बनसोडे यांच्याविरुद्ध भारतीय न्याय संहिता (BNS) कलम १४३(२), १४४, ३(५) सह अनैतिक मानवी व्यापार प्रतिबंधक कायदा (PITA) कलम ३, ४, ५, ६ अन्वये गुन्हा दाखल करण्यात आला आहे.
सोलापूर ग्रामीणच्या अनैतिक मानवी वाहतूक प्रतिबंधक कक्ष (AHTU) आणि अकलूज पोलिसांनी संयुक्त
कारवाई करत परिसरात खळबळ उडाली आहे. अकलूज पोलिसांच्या या लागोपाठच्या धडक कारवायांमुळे बेकायदेशीर लॉजिंग आणि अनैतिक व्यवसाय करणाऱ्यांचे धाबे दणाणले आहेत. या दोन्ही प्रकरणांचा पुढील तपास अकलूज पोलीस करत आहेत.
कोणत्याही टिप्पण्या नाहीत:
टिप्पणी पोस्ट करा