🌞*उन्हाळा*🌞
येता ऋतू हा उन्हाळा
कासावीस होतो जीव
ऊन येता डोईवरी
शोधे सावली सजीव ॥१
तृष्णा तहान भागवी
माठातील थंड पाणी
ऋतू वसंत येण्याने
वसुंधरा गाते गाणी ॥ २ ॥
कशी निसर्ग किमया
कधी वारा कधी गारा
साऱ्या जिवांचे ते हाल
कसा नशिबी पसारा ॥ ३ ॥
खार लोणचे पापड
स्त्रिया घरोघरी करी
अन्नधान्य कडधान्य
वाळवण डबे भरी ॥ ४ ॥
शुभ्र धवल मोगरा
पानोपानी हिरवळ
मन मोहक सुगंध
अंगणात दरवळ ॥५ ॥
सुट्टी लागता उन्हाळी
पूर्व नियोजन होई
चार दिस आनंदाचे
नको ताण भार डोई ॥६ ॥
घेऊ आरोग्य काळजी
नको मनी उष्मा खंत
सिंमेटच्या जंगलात
निसर्गाचा नको अंत ॥७ ॥
होता सूर्याचा प्रकोप
उसळते किती धग
अंगाची ती लाही लाही
जीवाची रे तगमग ॥८ ॥
बर्फगोळा आईस्क्रीम
मना समाधान देई
राजा फळांचा तो आंबा
आपल्या भेटीस येई ॥ ९ ॥
तप्त कडक उन्हाळा
नको सूर्या ठेवू नावं
निसर्गात रमताना
एक तरी झाड लाव ॥१० ॥
*कवयित्री*
*सुवर्णा घोरपडे*
संग्रामनगर-अकलूज
या.माळशिरस जि.सोलापूर
कोणत्याही टिप्पण्‍या नाहीत:
टिप्पणी पोस्ट करा