*कार्यकारी संपादक एस. बी. तांबोळी मोबाईल नंबर 8378081147*
कसली आली दिवाळी आणि कसल काय दिवसभर कष्ट केले तरच भाकरी मिळते. त्यामुळे दिवाळी काय, हे आम्हाला माहीतच नाही, दिवाळी आमच्यासारख्या सामान्यांसाठी नाही, तर ती श्रीमंत पैसेवालेची आहे," अशी ऊसतोड मजूर महिलांनी आपली व्यथा 'सकाळ' कडे व्यक्त केली.
इंदापूर तालुक्यात पोटाची खळगी भरण्यासाठी धुळे नंदुरबार, नगर, यवतमाळ, वाशिम, आष्टी, पाटोदा, गेवराई, जळगाव, बीड, माजलगाव बरोबरच कर्नाटक, मध्यप्रदेश मधूनही ऊसतोड मजूर दाखल झाले आहेत. त्यांची यंदाची दिवाळी राहुट्यांवर व उसाच्या फडातच साजरी होताना दिसत आहे. एकीकडे घरोघरी आकाश कंदिल व विद्युत रोषणाईचा झगमगाट, फटाक्यांची आतषबाजी, घरी केलेल्या खमंग खाद्य पदार्थांचा सुवास ओसंडून वाहत होता. तर दुसरीकडे मात्र ऊसतोड मजुरांचा दररोजचा दिनक्रमाचा विरोधाभासी चित्र पाहून मन हेलावून जाते.
यावर्षी गळीत हंगाम १ नोव्हेंबरपासून सुरू होणार असून इंदापूर तालुक्यातील नीरा भीमा सहकारी साखर कारखाना शहाजीनगर, कर्मयोगी शंकरराव पाटील बिजवडी, बारामती ॲग्रो शेटफळगढे, सासवड माळी शुगर फॅक्टरी माळीनगर, विठ्ठल सहकारी गंगामाई नगर या कारखान्यांनी गाळप सुरू केले आहे. त्यामुळे ऊस पट्ट्यातील चांगल्या प्रतीचा ऊस तालुक्यातील किंवा पर जिल्ह्यातील कारखाने सध्यातरी उचलत आहेत.
यावर्षी पावसाच्या दमदार हजेरी लावल्याने पुरसदृष्य परिस्थिती उद्भवली होती. त्यामुळे साखर कारखान्यांचा हंगाम थोड्या कालावधीचा असल्यामुळे प्रथमच थोडे थोडकेच ऊसतोड मजूर मुलाबाळांसह दाखल झाले आहेत. त्यामुळे आलेल्या मजुरांना दिवाळी उसाच्या फडात साजरी करावी लागत आहे.
संघर्ष आमच्या पाचवीलाच पूजलेला....
ऊसतोड मजूर ऊन, पाऊस, वारा, थंडी या कशाचीही पर्वा न करता कष्टाचे व कसरतीचे काम करत आहेत. सर्व आटापिटा घेतलेली उचल फेडण्यासाठीच असतो. या ऊसतोड कामगारांचा संपूर्ण दिवस उसाच्या फडात जातो. पोटासाठीचा संघर्ष आमच्या पाचवीलाच पुजला असल्याची ऊसतोड मजूरांनी 'सकाळ' शी बोलताना सांगितले.
तसेच रोजच्या मिठ, मिरची, भाकरीचा आस्वाद हा दिवाळीच्या गोड पदार्थापेक्षाही कितीतरी अधिक पटीने स्वादिष्ट लागत असतो असेही ऊसतोड मजुरांनी सांगितले.
फोटो - पिंपरी बुद्रुक येथे दिवाळीतही ऊसतोड महिला ऊस तोडून भरण्यात दंग आहेत.
---------------------------
कोणत्याही टिप्पण्‍या नाहीत:
टिप्पणी पोस्ट करा