मुख्यसंपादक --टाइम्स 45 न्यूज मराठी
मो:-- 9730 867 448
सध्या गाजत असलेला मराठी चित्रपट ‘दशावतार’ रसिकांच्या मनावर अधिराज्य गाजवत असतानाच, मराठी व हिंदी चित्रपटसृष्टीत आपल्या सूक्ष्म, संवेदनशील आणि आशयघन अभिनयाने अढळ स्थान निर्माण करणारे ज्येष्ठ कलावंत, लेखक व विचारवंत दिलीप प्रभावळकर सर यांची प्रत्यक्ष भेट होण्याचा आनंददायी योग आला.
रंगभूमी, दूरदर्शन आणि चित्रपट या तिन्ही माध्यमांतून प्रभावळकर सरांनी साकारलेली पात्रे ही केवळ भूमिका न राहता समाजमनावर ठसा उमटवणारी ठरली आहेत.नाटकांमधील त्यांच्या भूमिका असोत वा चित्रपटांतील व्यक्तिरेखा—प्रत्येक ठिकाणी त्यांनी अभिनयाची एक वेगळी उंची गाठली आहे. सध्या प्रदर्शित ‘दशावतार’ या चित्रपटातूनही त्यांनी पुन्हा एकदा आपल्या अभिनयातील खोली आणि अनुभव सिद्ध केला आहे.
विशेषतः हिंदी चित्रपट ‘मुन्ना भाई एम.बी.बी.एस.’ मधील बापू ही त्यांची भूमिका आजही रसिकांच्या मनात घर करून आहे. अत्यंत संयत, करुण आणि मानवी मूल्यांची जाणीव करून देणारा बापूचा रोल प्रभावळकर सरांनी इतक्या सहजतेने आणि प्रभावीपणे साकारला की, त्या भूमिकेला तोड नाही असेच म्हणावे लागेल. संवाद कमी पण भावभावना प्रखर—असा हा अभिनय त्यांच्या कारकीर्दीतील एक अजरामर ठसा ठरला.
या भेटीप्रसंगी गावगाथा दिवाळी अंक सन्मानपूर्वक प्रभावळकर सरांना भेट देण्यात आला. ग्रामीण संस्कृती, मातीशी नाळ जोडणाऱ्या आठवणी, समाजजीवनाचा वेध घेणारे लेखन याबाबत त्यांनी विशेष आपुलकी व्यक्त केली. गावगाथासारख्या उपक्रमांमुळे गाव, माणूस आणि संस्कृती यांचे जतन होत असल्याचे त्यांनी नमूद केले.
ही भेट केवळ एका महान कलाकाराशी झालेली ओळख नव्हती, तर कला, साहित्य आणि समाज यांचा परस्परसंबंध समजावून देणारा समृद्ध अनुभव ठरला. दिलीप प्रभावळकर सरांचे साधेपण, प्रगल्भ विचार आणि अभिनयातील प्रामाणिकपणा नव्या पिढीसाठी निश्चितच प्रेरणादायी आहे. गावगाथा दिवाळी अंक त्यांच्या हाती देताना मिळालेला हा क्षण कायम स्मरणात राहणारा ठरेल.
*धोंडाप्पा नंदे , वागदरी -वागदरी अक्कलकोट*
कोणत्याही टिप्पण्या नाहीत:
टिप्पणी पोस्ट करा