*रोटरी क्लब ऑफ सोलापूर च्या वतीने रोटरी व्यवसायिक सेवा पुरस्कार समारंभाचे आयोजन*

 *मुख्य संपादक* 

  *टाइम्स 45 न्यूज मराठी*

      *मो:-9730867448*

सोलापूर - रोटरी क्लब ऑफ सोलापूरतर्फे विविध व्यवसायांतील उत्कृष्टतेचा गौरव करण्यासाठी आणि समाजसेवेसाठी कार्यरत असलेल्या व्यक्तींना सन्मानित करण्याच्या उद्देशाने “रोटरी व्यावसायिक सेवा पुरस्कार (Rotary Vocational Service Awards)” समारंभाचे आयोजन करण्यात आले.

दिनांक २० मार्च २०२६ रोजी हॅच फ्री मेसन्स हॉल येथे आयोजित केलेल्या या समारंभात विविध क्षेत्रांमध्ये उल्लेखनीय कार्य करणाऱ्या सहा मान्यवरांचा सन्मान करण्यात आला. कार्यक्रमाचे प्रमुख अतिथी उद्योजक श्री. वासुदेव बंग तसेच रोटरी डिस्ट्रिक्टचे नियुक्त प्रांतपाल रोटे. जयेश  पटेल होते. पुरस्कारप्राप्तांमध्ये श्री. प्रमोद वाघमारे (वरिष्ठ पोलीस निरीक्षक), सौ. सुनीता जानराव (नर्स), श्री. रमेश भडंगे (एस.टी. चालक), श्री. बाळासाहेब सुरवसे (वायरमन, एमएसईबी), श्री. बलभीम सिताप (टपाल कर्मचारी) आणि श्री. नंदकिशोर कुगावकर (लोको पायलट) यांचा समावेश होता.

यावेळी “बेस्ट पोलीस स्टेशन” पुरस्कार एमआयडीसी पोलीस स्टेशनला प्रदान करण्यात आला असून, क्लबतर्फे फिरता चषक देण्यात आला.

कार्यक्रमात क्लबच्या अध्यक्षा रोटे. धनश्री केळकर यांनी सर्वांचे स्वागत करून क्लबच्या कार्याची माहिती दिली. 

या कार्यक्रमाचे प्रमुख पाहुणे श्री. वासुदेव बांग यांनी व्यावसायिक सेवेचे महत्त्व अधोरेखित करताना, विविध क्षेत्रांतील कर्तृत्ववान व्यक्तींचा शोध घेऊन त्यांचा सन्मान करण्याच्या रोटरी क्लबच्या उपक्रमाचे कौतुक केले. तसेच समाजासाठी सातत्याने केलेल्या कार्याचेही त्यांनी अभिनंदन केले.

कार्यक्रमात प्रमुख पाहुण्यांचा परिचय रोटे. मितेश पंचमिया यांनी करून दिला. पुरस्कारप्राप्तांचा परिचय रोटे. पराग कुलकर्णी आणि रोटे. विलास कोळे यांनी करून दिला. कार्यक्रमाच्या शेवटी आभार प्रदर्शन रोटे. निलेश फोफलिया यांनी केले.

हा उपक्रम यशस्वीपणे पार पाडण्यासाठी वोकेशनल सर्व्हिस डायरेक्टर रोटे. पराग कुलकर्णी यांच्या नेतृत्वाचे आणि त्यांच्या परिश्रमांचे क्लबतर्फे विशेष कौतुक करण्यात आले.